ഇന്നത്തെ പ്രഭാതം

Blog Post No: 192 -

ഇന്നത്തെ പ്രഭാതം

(ഒരു കൊച്ചുവർത്തമാനം)

ഓഫീസ്സിലെത്തി സിസ്റ്റം തുറന്നു.  മുഖപുസ്തകത്തിൽ ക്ലിക്ക് ചെയ്തു.  ആദ്യമായി, ചാറ്റിൽ അവൾക്കൊരു ഗ്രീറ്റിങ്ങ്സ് മെസ്സേജ് ഇട്ടുകളയാം, ഐശ്വര്യത്തോടെ - രാഹുൽ വിചാരിച്ചു.

''സുപ്രഭാതം''

അതാ മറുപടി വന്നല്ലോ:

''നന്ദി, എന്നാൽ ഇന്നത്തേതു സുപ്രഭാതം ആയില്ല.''

''എന്ത് പറ്റി?''

''ഒരു കള്ളപ്പന്നി എന്റെ ഡ്രെസ്സിൽ മുഴുവൻ ചെളിവെള്ളം തെറിപ്പിച്ചു.  റോഡിനരികിൽ വെള്ളമുണ്ടായിരുന്നു. ഒന്ന് ഒതുങ്ങിമാറിനില്ക്കാൻ തുടങ്ങുമ്പോഴേക്കും അവൻ വണ്ടി ആ ചെളിവെള്ളത്തിലൂടെ ഓടിച്ചുപോയി.''

''അത്  കഷ്ടമായല്ലോ. എന്നിട്ട്?''

''എന്നെട്ടെന്താ, ഓഫീസിൽ വന്നു ബാത്രൂമിൽ കയറി, വൃത്തിയാക്കി.  ആകെ നനഞ്ഞിരിക്കുന്നു.''

''തിരിച്ചു പോയ്ക്കൂടായിരുന്നോ?''

''ഓ, നല്ല ജോലിയുണ്ട്.  പോയാൽ ശരിയാവില്ല.''

''എന്നിട്ടാണോ, വന്നതും മുഖപുസ്തകം തുറന്നത്?''

''ഡാ, എനിക്ക് നല്ല ദേഷ്യം വരുംട്ടോ.  അല്ലെങ്കിലേ ഞാൻ ദേഷ്യം പിടിച്ചിരിക്കുകയാ.  വന്നു തുറന്നതേയുള്ളൂ.  മെസ്സേജിനു മറുപടി ഇടാം എന്ന് വിചാരിച്ചപ്പോൾ....''

''അയ്യോ, ദേവീ കോപിക്കല്ലേ.  ഞാൻ പോയ്ക്കളയാം.  അടിയൻ അറിയാതെ പറഞ്ഞുപോയതാണേ.''

''അങ്ങനെ വഴിക്ക് വാ.  ശരി.  ക്ഷമിച്ചിരിക്കുന്നു.''

''ക്ഷമിച്ചാൽ മാത്രം പോരാ. പ്രസാദിക്കണം.''

''പോടാ തെമ്മാടീ, ഞാൻ പോകുന്നു.''

''അയ്യോ, ദേവീ പോകല്ലേ, പോകല്ലേ ദേവീ പോകല്ലേ....''

''ഹാ ഹാ''

''ഹാവൂ, ചിരിച്ചുകണ്ടല്ലോ.''

''ഇനി എന്ത് വേണം?"

''ഇനി എന്ത് വേണം എന്ന് ചോദിച്ചാൽ...  അതിനും പിണങ്ങില്ലേ?''

''ഉവ്വ്.''

''ന്നാൽ, ഞാൻ പോകുന്നു.''

''മണ്ടച്ചാരേ, വേഗം കാര്യം പറ വല്ലതുമുണ്ടെങ്കിൽ.''

''പറയാം, നേരിട്ടാകട്ടെ, വൈകീട്ട്.''

''ഇപ്പൊ പറ.''

''ഇല്ല, ഇപ്പൊ പറഞ്ഞാ ശരിയാകില്ല.  നത്തിംഗ് സീരിയസ്.  നീ ജോലി ചെയ്തോ.''

''എന്നാ ശരി,  പോയ്‌ തൊലയ്. :)  ബൈ.''