കുളിർമഴ

Blog post no: 195 -

കുളിർമഴ

(മിനിക്കഥ)

കാലത്ത് ഓഫീസിൽ പോകുന്നതിനു മുമ്പായി അയാൾ ശ്രദ്ധിച്ചു - അവളുടെ മുഖം കടന്നൽ കുത്തിയപോലെ ഇരിക്കുന്നു!  പ്രത്യേകിച്ചൊരു കാരണവും കാണുന്നില്ല.  ചോദിച്ചപ്പോൾ ഒന്നുമില്ല എന്ന് പറഞ്ഞു.  ഓഫീസിൽ എത്തിയ ശേഷം ഫോണ്‍ ചെയ്തു വല്ല അസുഖവും ഉണ്ടോ എന്ന് ചോദിച്ചപ്പോഴും തഥൈവ!  വൈകീട്ട് വീട്ടിൽ എത്തിയ ശേഷവും   ഒരു രക്ഷയില്ല!  സഹികെട്ട് പൊട്ടിത്തെറിച്ചപ്പോൾ, അവൾ കരഞ്ഞു .  കരച്ചിനിടയിൽ വാക്കുകൾ പുറത്ത് വന്നു - ന്റെ  പിറന്നാൾ ഇന്നാണെന്ന് ഞാൻ പറഞ്ഞത് മറന്നൂല്ലേ?

അയാളുടെ കണ്ണുകൾ ഉരുണ്ടു.  തലയിൽ കൈവെച്ചു.  അനന്തരം അവളെ ചേർത്തുപിടിച്ചു, പശ്ചാത്താപവിവശനായി മൊഴിഞ്ഞു:  ഐ ആം സോറി.

അവളുടെ കണ്ണ് തുടച്ചു, കൈ കൊടുത്തിട്ടു പറഞ്ഞു - ആശംസകൾ.  ഗെറ്റ് റെഡി.  വല്ലതും ഉണ്ടാക്കിയിട്ടുണ്ടെങ്കിൽ ഒക്കെ എടുത്തു ഫ്രിഡ്ജിൽ വെച്ചോ.  നമുക്ക് പുറത്തുപോയി കഴിക്കാം.  പിന്നെ നാം സംസാരിച്ചതും.  ഓക്കേ?  ഇനി ഒന്ന് ചിരിക്കു നോക്കട്ടെ.

കാർമേഘം  നീങ്ങി. മഴ പെയ്തു - കുളിർമഴ...