തൊഴുത്തിൽ കുത്ത്

തൊഴുത്തിൽ കുത്ത്

അയാള്:  പണ്ട് ഞാൻ കോളേജിൽ പഠിച്ചിരുന്ന കാലത്ത് മുദ്രാവാക്യങ്ങൾ വിളിച്ചു പറയുമ്പോൾ....  

ഭാര്യ: നിക്കട്ടെ, നിക്കട്ടെ.  നിങ്ങള് മുദ്രാവാക്യങ്ങൾ വിളിച്ചിട്ടുണ്ടെന്നോ? 

അയാള്: നീ,   തോക്കിനകത്തു കയറി വെടിവെക്കുന്നു .  എന്നെപ്പറ്റി പിന്നെന്താ വിചാരിച്ചേ? 

ഭാര്യ:  എന്തോ, എനിക്കങ്ങോട്ട് വിശ്വാസം വരുന്നില്ല.  ശരി, എന്നാ അതൊന്നു കേട്ടിട്ടുതന്നെ കാര്യം.  

അയാള്:  കാശ്മീർ നമ്മുടെ നാടാണ്.  അവിടെ  കയറിയതാരാണ്.

ഭാര്യ:  അതുശരി.  ഇതാപ്പോ നന്നായേ.  ഞാൻ വിചാരിച്ചൂ... 

അയാള്:  എന്ത്  വിരാചിച്ചൂ?  

ഭാര്യ:  അതൊക്കെ പോട്ടെ, മുഴുവനാക്കു.

അയാള്: 

കാശ്മീർ നമ്മുടെ നാടാണ് 

അവിടെ കയറിയതാരാണ് 

ആരായാലും കയറുന്നവരുടെ...

ബാക്കി ഓര്മ്മയില്ല. എന്നാലും അതിനു ശേഷമുള്ളത് നോക്കട്ടെ. 

അയാളുടെ വാമഭാഗം കൌതുകത്തോടെ താടിക്ക്   കയ്യും കൊടുത്തു കേള്ക്കാനിരുന്നു.  അയാള് തുടർന്നു:

കാശ്മീരത്തിൽ കൊതി വേണ്ടാ 

നുഴഞ്ഞു കയറാൻ നോക്കണ്ട 

പാറ്റൻടാങ്ക് തകര്ക്കാനും 

സാബര്ജെറ്റുകൾ വീഴ്ത്താനും 

ഭാരതജനതക്കെന്തുണ്ട് 

നെഞ്ഞൂക്കെന്നൊരു തോക്കുണ്ട് 

ഹുങ്ക് പറഞ്ഞിട്ടെന്തായി 

നുഴഞ്ഞു കയറീട്ടെന്തായി 

ഭൂട്ടോ നിന്പട പൊട്ടിപ്പോയ് 

ഭാര്യ:  പിന്നെ? 

അയാള്:  പിന്നെ...   

മഞ്ഞണിഞ്ഞ മാമലയിൽ 

നമ്മുടെ സോദരരൊഴുക്കുന്ന 

ഓരോ തുള്ളി ചോരക്കും 

പകരം ഞങ്ങൾ ചോദിക്കും 

ഭാര്യ:  കഴിഞ്ഞോ?

അയാള്:  ഉവ്വെന്നു തോന്നുന്നു.  അപ്പഴേ, ഏതോ രാഷ്ട്രീയപ്പാര്ട്ടിയുടെ മുദ്രാവാക്യം ആണെന്ന് വിചാരിച്ചു അല്ലെ, ആദ്യം? അല്ല, ഈ മുദ്രാവാക്യങ്ങൾ   ഭരണപക്ഷവും,. പ്രതിപക്ഷവും, വിദ്യാര്ത്ഥി സംഘടനകളും എല്ലാം ഒറ്റക്കെട്ടായി  പറഞ്ഞിരുന്നു.  

ഭാര്യ:  എന്നുവെച്ചാൽ,   ഇതുപോലെ വല്ലതും വരണം അല്ലെ എല്ലാം ഒറ്റക്കെട്ടായി നിക്കാൻ? അല്ലെങ്കിൽ എന്നും തൊഴുത്തിൽ കുത്ത് തന്നെ എന്നര്ത്ഥം!?

അയാള്:  ...........