കുഞ്ഞുകവിതകൾ - 68

Blog Post No: 309

കുഞ്ഞുകവിതകൾ - 68

ഇഷ്ടം

ആൽമരമെനിക്കിഷ്ട-

മാൽത്തറയെനിക്കിഷ്ട-

മവിടത്തെ കാറ്റിനെയെനിക്കിഷ്ട-

മാലിലക്കണ്ണനാദ്യത്തെ ഇഷ്ടം.

വികടസരസ്വതി

ചിലരെന്നുമനുഗ്രഹീതർ

സരസ്വതീകടാക്ഷത്താൽ;

ചിലർക്കെന്നും വിളങ്ങുന്നു

നാവിൽ ''വികടസരസ്വതി''.

ചെമ്പരത്തി

വേലിയിൽ ഭംഗിയുള്ളൊരു ചെമ്പരത്തി

വെറുതേ  അതിനെ നോക്കി നിന്നു

ചെമ്പരത്തിക്കവിതകളും

ചെമ്പരത്തിഗാനങ്ങളുമോർത്തു

പുറകിൽനിന്ന് ചിരിച്ചുകൊണ്ടൊരു ചോദ്യം -

പറിച്ചു ചെവിയിൽ വെക്കുന്നോ?

കവിയും കാമുകനും ഭ്രാന്തുണ്ടത്രേ

കാമുകനല്ല ഞാൻ

കവിയാണോ? ആണെങ്കിലുമല്ലെങ്കിലും 

കവിമനമാണോ ഇത് കേൾപ്പിച്ചത്?

ചോദ്യകർത്താവിനാണോ ഭ്രാന്ത്

ചെമ്പരത്തി വരുത്തിവെച്ചൊരു കാര്യം!