മനുഷ്യമനസ്സും ദൈവവും

Blog No: 314 -

മനുഷ്യമനസ്സും ദൈവവും

(Gadyakavitha)

ദൈവമെവിടെ?

അല്ലെങ്കിൽ മനുഷ്യശക്തിക്ക് അതീതമായ ആ ശക്തിയെവിടെ?

പ്രപഞ്ചത്തിൽ, പ്രകൃതിയിൽ ആകമാനം നിറഞ്ഞുനില്ക്കുന്നു.

അപ്പോൾ?

നമ്മുടെ മനസ്സിലും മസ്തിഷ്കത്തിലും എല്ലാം.... എല്ലാം.....

ചിലപ്പോൾ നാം അഥവാ നമ്മുടെ  മനസ്സ്, മനസ്സിൽത്തന്നെ കുടികൊള്ളുന്ന ദൈവത്തെ  അനുസരിക്കുന്നു.

ചിലപ്പോൾ ഇല്ല - അല്ലെങ്കിൽ  പല കാരണങ്ങളാൽ സാധിക്കുന്നില്ല.  അതാണ്‌  സത്യം.

ഫലം?

അനുഭവിക്കാതെ നിവർത്തിയില്ല – ദൈവേശ്ച / പ്രപഞ്ച - പ്രകൃതി നിയമം!

വിശ്വാസം വരാത്തവർക്ക് ഒരു തീരാദു:ഖം വരുമ്പോൾ, എന്നെങ്കിലും, കണ്ണുകൾ എന്നെന്നേക്കുമായി അടയുന്നതിനു മുമ്പായെങ്കിലും വിശ്വാസം വന്നോളും.

കുഞ്ഞുകവിതകൾ - 72

Blog Post No: 313

കുഞ്ഞുകവിതകൾ - 72

വാടി

വാടിയിലെ പുഷ്പം വാടിയതിനാൽ

വാടിയ പുഷ്പം ചൂടിനോക്കിയപ്പോൾ

പുഷ്പയുടെ മുഖം വാടിപ്പോയി;

പുഷ്പവും പുഷ്പയും ''തൊട്ടാവാടി''കൾ.

മനസ്സാന്നിദ്ധ്യം

മനസ്സാന്നിദ്ധ്യം കുറവുള്ളോർ

മനസ്സാന്നിദ്ധ്യത്തിനായ് ശീലിക്കണം;

മനസ്സാന്നിദ്ധ്യമുണ്ടെങ്കിലേ

''മലപോലെ വന്നത് എലിപോലെ'' പോകൂ!

രോഗിയും ചികിത്സയും

വേറിട്ടുനിൽക്കുന്നു ഒരാൾ വേറൊരാളിൽനിന്നും

ശാരീരികവും മാനസികവുമായിത്തന്നെ;

ശരീരോഷ്മാവും രക്തസമ്മർദ്ധവു-

മെല്ലാമൊരാൾക്കയാളുടേതു മാത്രമാം.

രോഗപ്രതിരോധശക്തിയോ പല വ്യക്തികളി-

ലുറപ്പായും വേറിട്ടുനിൽക്കുമ്പോ,ളങ്ങനെയല്ലാതെ-

‘’യൊരേ  ചികിത്സയൊരുപോലെ’’ കൊടുത്താ-

ലതു രോഗിയോടു കാട്ടുന്ന ക്രൂരത മാത്രമത്രേ!  

കുഞ്ഞുകവിതകൾ - 71

Blog Post No: 312

കുഞ്ഞുകവിതകൾ - 71

നന്മയുള്ളവരും അല്ലാത്തവരും

ദൈവവും പിശാചും കണ്ടുമുട്ടി,

ദൈവം പിശാചിനെക്കണ്ടു  ചിരിച്ചു;

പിശാച് തിരിച്ചു ചിരിച്ചില്ല!

തന്റെ ശിങ്കിടിയോട് പറഞ്ഞു,

''പാവം ചമ്മിപ്പോയത് കണ്ടോ?'' 

ദൈവത്തിനും പ്രതിനിധിക്കും 

ആ പറഞ്ഞത്  മനസ്സിലായി;

പ്രതിനിധി മനസ്സിൽ പറഞ്ഞു,

''പിശാചേ, അതാണ്‌ നീയും

ദൈവവും തമ്മിലുള്ള വ്യത്യാസം

ദൈവം നിന്റെ എല്ലാ  

തിന്മകളും സഹിക്കുന്നു

നീയോ ദൈവത്തിന്റെ

നന്മകൾ സഹിക്കുന്നില്ല.''

മേമ്പൊടി:  ദൈവവും പിശാചും മനുഷ്യമനസ്സിൽത്തന്നെയാണ് കുടികൊള്ളുന്നത് - ജാതി-മത ഭേദമെന്യേ! അതിൽ ഒരു സംശയവും വേണ്ട.   നന്മ ചിന്തിക്കുന്നവർ, പ്രവർത്തിക്കുന്നവർ നല്ലവർ - ദൈവത്തിന്റെ അടുത്ത ആൾക്കാർ.  അല്ലാത്തവർ മറിച്ചും.  ഒരു സ്വയവിചിന്തനം നന്നായിരിക്കും.

കുഞ്ഞുകവിതകൾ - 70

Blog Post No: 311

കുഞ്ഞുകവിതകൾ - 70

 

പ്രകൃതിയും മനുഷ്യനും

പ്രകൃതി മനുഷ്യനെ മനുഷ്യനാക്കുമ്പോൾ

മനുഷ്യൻ പ്രകൃതിയെ പ്രാകൃതമാക്കുന്നു;

പ്രകൃതിയെ അനുസരിക്കാൻ തയ്യാറല്ലാത്ത

മനുഷ്യന്റെ പ്രകൃതം പ്രാകൃതമാകുന്നു! 

നൊമ്പരം

നൊമ്പരമെന്ന വാക്കുതന്നെ വെറുതേ

നൊമ്പരമുണ്ടാക്കുന്നു ചിന്തിക്കുമ്പോൾ;

നൊമ്പരമുണ്ടായാലതു വിധി,യെന്നാൽ

നൊമ്പരമുണ്ടാക്കിയാലോ, അത് ചതി.

വിശ്വാസം

വിശ്വാസം നേടുന്നതൊരാശ്വാസം

വില്ലത്തരം തോന്നിയാലത്‌

വിശ്വാസം തെറ്റിക്കുമെന്നു സത്യം

വില്ലത്തരം  വേണ്ട, വിശ്വാസം മതി.  

കുഞ്ഞുകവിതകൾ - 69

Blog Post No: 310

കുഞ്ഞുകവിതകൾ - 69

പൂജ്യം

നന്മകളേറെയുണ്ടെന്നിരിക്കിലും

കോപ, മഹംഭാവമിത്യാദിയുണ്ടെങ്കിലോ

മറ്റുള്ളവർക്കതൊരു ശല്യമെന്നതുമാത്രമല്ല

താൻ പൂജ്യനല്ല, വ്യക്തിത്വം പൂജ്യമെന്നതുതന്നെ.

Haiku

മലമുകളിൽ ദൈവം

കയറുന്ന ഭക്തജനങ്ങൾക്ക്‌

ഇറങ്ങുമ്പോൾ സംതൃപ്തി  

***

രൂപങ്ങൾ നീങ്ങുന്നില്ല

നിഴലുകൾ നീങ്ങിക്കൊണ്ടിരിക്കുന്നു

സൂര്യനെ അനുസരിച്ചുകൊണ്ട്

കുഞ്ഞുകവിതകൾ - 68

Blog Post No: 309

കുഞ്ഞുകവിതകൾ - 68

ഇഷ്ടം

ആൽമരമെനിക്കിഷ്ട-

മാൽത്തറയെനിക്കിഷ്ട-

മവിടത്തെ കാറ്റിനെയെനിക്കിഷ്ട-

മാലിലക്കണ്ണനാദ്യത്തെ ഇഷ്ടം.

വികടസരസ്വതി

ചിലരെന്നുമനുഗ്രഹീതർ

സരസ്വതീകടാക്ഷത്താൽ;

ചിലർക്കെന്നും വിളങ്ങുന്നു

നാവിൽ ''വികടസരസ്വതി''.

ചെമ്പരത്തി

വേലിയിൽ ഭംഗിയുള്ളൊരു ചെമ്പരത്തി

വെറുതേ  അതിനെ നോക്കി നിന്നു

ചെമ്പരത്തിക്കവിതകളും

ചെമ്പരത്തിഗാനങ്ങളുമോർത്തു

പുറകിൽനിന്ന് ചിരിച്ചുകൊണ്ടൊരു ചോദ്യം -

പറിച്ചു ചെവിയിൽ വെക്കുന്നോ?

കവിയും കാമുകനും ഭ്രാന്തുണ്ടത്രേ

കാമുകനല്ല ഞാൻ

കവിയാണോ? ആണെങ്കിലുമല്ലെങ്കിലും 

കവിമനമാണോ ഇത് കേൾപ്പിച്ചത്?

ചോദ്യകർത്താവിനാണോ ഭ്രാന്ത്

ചെമ്പരത്തി വരുത്തിവെച്ചൊരു കാര്യം!

കുഞ്ഞുകവിതകൾ - 67

 Blog Post No: 308

കുഞ്ഞുകവിതകൾ - 67

പട്ടണ ഭംഗി

മൈസൂർ ചാമുണ്ടിഹിൽസ്

ഇറങ്ങുമ്പോൾ താഴെ 

മൈസൂരിന്റെ ഭംഗി

സൗദി, റിയാദിലെ

കിംഗ്‌ഡം ടവറിന്റെ

സ്കൈബ്രിഡ്ജിൽ

നിന്നുള്ള കാഴ്ചപോലെ

മനോഹരം!

അവരുടെ കണ്ണുകൾ

.

അയാൾ കണ്ണുരുട്ടിക്കാണിച്ചപ്പോൾ ഭയം,

അയാൾ കണ്ണുകാണാത്തവനെന്നറിഞ്ഞപ്പോൾ സഹതാപം;

അവളുടെ കണ്ണുകൾ ചിത്രത്തിൽ കാണുമ്പോൾ മനോഹരം,

അവൾ  കണ്ണുകാട്ടി വിളിച്ചപ്പോൾ സംഭ്രമം!

  

ഭക്തി!?

തൊഴുകയ്യോടെ പ്രാർത്ഥിക്കുന്നു ചിലർ

തോന്നുന്നതോ ഭക്തിയല്ലാത്തതും,

തൊഴിയ്ക്കണം ചിലരെയെന്നുള്ള

തോന്നലാണീ ''ഭക്തശിരോമണികൾ''ക്ക്!    

ഒന്നു കൊന്നുതരാമോ?

Blog post no: 307 -

ഒന്നു കൊന്നുതരാമോ?

(ഓട്ടന്തുള്ളൽ)

സമയപരിധി : 3 നിമിഷം

അവതരണം :  ഡോ.  പി.  മാലങ്കോട്

പിൻപാട്ട് :

ബിനു വാസുദേവൻ

സത്താർ അൽ-മവാഹിബ്

***

ഭക്ഷണപ്രിയനാം കഥാനായകന്ന്

പിൻപാട്ട് :

ഭക്ഷണപ്രിയനാം കഥാനായകന്ന്

കേൾക്കണേ, പ്രമേഹം വന്നു, പിന്നെ

പിൻപാട്ട് :

ഭക്ഷണപ്രിയനാം കഥാനായകന്ന്

കേൾക്കണേ, പ്രമേഹം വന്നു, പിന്നെ

രക്ത സമ്മർദ്ധവും വന്നു;

പിൻപാട്ട് :

രക്തസമ്മർദ്ധവും വന്നു;

മധുരം വേണ്ടാ, ഉപ്പും വേണ്ടായെന്ന്

പിൻപാട്ട് :

മധുരം വേണ്ടാ, ഉപ്പും വേണ്ടായെന്ന്

വൈദ്യശിരോമണി കൽപ്പിച്ച നേരത്ത്

പിൻപാട്ട് :

കൽപ്പിച്ച നേരത്ത്

പായസപ്രിയനാം,

ഉപ്പിലിട്ടതിഷ്ടംപോൽ തട്ടുന്നയാളാം

പിൻപാട്ട് :

പായസപ്രിയനാം,

ഉപ്പിലിട്ടതിഷ്ടംപോൽ തട്ടുന്നയാളാം

നമ്മുടെ നായകൻ കരഞ്ഞൂപറയുന്നൂ

പിൻപാട്ട് :

നമ്മുടെ നായകൻ കരഞ്ഞൂപറയുന്നൂ

''ഹെന്നെയൊന്നു കൊന്നുതരാമോ വൈദ്യരേ''

(കരയുന്നു)

പിൻപാട്ട് :

നമ്മുടെ നായകൻ കരഞ്ഞൂപറയുന്നൂ

''ഹെന്നെയൊന്നു കൊന്നുതരാമോ വൈദ്യരേ''