സ്പെഷ്യൽ ഇഡലി

Blog No: 148 - 

സ്പെഷ്യൽ ഇഡലി

(നർമ്മം)

അയാൾ ഇഡലിപ്രിയനായിരുന്നു.  അതായത്, ഇന്നുകാലത്തെ ഇഡലിപോലെ അല്ല, മുമ്പ്  ഇഡലിമാവ്  ഇഡലിതട്ടിന് മുകളിൽ വിരിച്ച തുണിയിൽ ഒഴിച്ച് ശരിയായ രീതിയിൽ ഉണ്ടാക്കുന്ന സ്വാദുള്ള ഇഡലി.  ഭാര്യ മതിയാക്കാൻ പറഞ്ഞാൽ മാത്രം മനസ്സല്ലാ മനസ്സോടെയായിരിക്കും പാവം മതിയാക്കുക. 

അപ്പോൾ, എന്ത് പറ്റി?  പുള്ളിക്കാരൻ പറഞ്ഞ കഥ ഇതാ:

ഒരിക്കൽ, ഒരു ബന്ധുവീട്ടിൽ കുടുംബസമേതം പോയി.  രാത്രി അവിടെ തങ്ങേണ്ടിവന്നു.  പിറ്റേ ദിവസം കാലത്ത് ഇഡലിയും ചട്ണിയും ഉണ്ടായിരുന്നു.  കുശാലായി തട്ടി.  മതിയാക്കിക്കോളാൻ ഭാര്യ കണ്ണ് കാണിച്ചപ്പോൾ മതിയാക്കി.  ശരിയാണ്, സ്വന്തം വീടല്ല. ''നീ കഴിക്കുന്നില്ലേ'' എന്ന് ചോദിച്ചപ്പോൾ, ''വേണ്ട'' എന്നായിരുന്നു മറുപടി.

പിന്നീട്, നീ എന്താ ''വേണ്ടാ'' എന്ന് വെച്ചത് എന്ന ചോദ്യത്തിന് മറുപടി ഇങ്ങനെ:

വലിയമ്മ ഇഡലിത്തുണി തിരഞ്ഞു, കിട്ടാതെ വന്നപ്പോൾ, വലിയച്ഛന്റെ ഒരു പഴയ കൌപീനം എടുത്തു മുറിച്ചു കഷ്ണങ്ങൾ ആക്കി.  അതിൽ ഉണ്ടാക്കിയ ഇഡലി ആയിരുന്നു! എനിക്ക് വേണ്ടാ ആ സ്പെഷ്യൽ - കോണകൂഡ്ളി!

കഥാനായകൻ അത് കേട്ട പാതി, കേള്ക്കാത്ത പാതി ഓക്കാനിച്ചു.  അതിനുശേഷം ഇന്നേവരെ പാവത്തിന് ഇഡലി വേണം എന്ന് തോന്നിയിട്ടില്ല.  തുണി ഉള്ളതായാലും ശരി, ഇല്ലാത്തതായാലും ശരി - വേണ്ടേ വേണ്ട.