കൂടുതൽ സുഖം

സുഖം…. സുഖം…

കുഞ്ഞുങ്ങളോടായ്ച്ചോദിച്ചു, പ്രിയങ്കരിയാമാമദ്ധ്യാപിക, 

"കൂടുതൽ സുഖമെപ്പോഴെന്ന് ചൊല്ലാമോ ആർക്കെങ്കിലും"

ഉണ്ണുമ്പോൾ നല്ല സുഖമാ,ണെന്ന്  അതാ വരുന്നൊരുത്തരം,

‘’ഉറങ്ങുമ്പോളാണേറ്റവും സുഖ’’മെന്നതാ വേറൊരുത്തരം!

''കുളിക്കുമ്പോളെന്തൊരു സുഖ''മെന്നൊയി കുറുമ്പുള്ളൊരാൾ,

“കളിക്കുമ്പോളാണീ സുഖമത്രയും”മെന്നായവന്റെ ചങ്ങാതി.

ഉത്തരങ്ങളിമ്മട്ടിലോരോന്നായ് പറഞ്ഞു കുഞ്ഞുങ്ങളേവരും.

അധ്യാപികതന്നുത്തരം കേൾക്കണമെന്നായി പിന്നീടവർ.

‘’അരുതാത്തതു ചെയ്യുന്നതിലാണേവർക്കും സുഖ''-

മെന്നൊരുത്തരമുറപ്പിച്ചാ ഗുരുനാഥ ചൊന്നപ്പോ-

ളതെന്തെന്നറിയണമെന്നായി കുട്ടികളെല്ലാവരും.

''കേൾക്കാൻ സുഖമില്ലെങ്കിലുമിതാ കേൾക്കണമാ സത്യം -

‘’ദേഹത്തിലവിടവിടെ വൃണങ്ങൾ വരുമ്പോ-

ളതു മെല്ലെ ചൊറിയുമ്പോ''ളാണത്രെയേറെ സുഖം!

അരുതാത്തതൊന്നുമിമ്മട്ടിൽ തോന്നാതിരിക്കട്ടെ നിങ്ങൾക്ക് -

ഇവ്വണ്ണമുപദേശിച്ചു ചിരിച്ചുകൊണ്ടായധ്യാപിക.