കുട്ടിമാമയും കുട്ട്യോളും (ഒരു കുട്ടി നര്‍മ്മം)

 

മുന്‍‌കൂര്‍ ജാമ്യം:

 

ഇതൊരു കുട്ടിക്കൂട്ടം (കുട്ടി വര്‍ത്തമാനം)  ആയതുകൊണ്ട് നിങ്ങള്‍ ഒരുപാട് തവണ ''കുട്ടി, കുട്ടി'' എന്ന് വായിക്കും. അപ്പോള്‍, ഒരുപക്ഷെ, ''ഇഞ്ചി കടിച്ച കു......... പോലെ'' ആയേക്കാം.  ഒരു രക്ഷയുമില്ല :)   




കുട്ടിമാമയെ കുട്ടികള്‍ക്കൊക്കെ ഇഷ്ടമാണ്. കുട്ടിമാമക്കും കുട്ടികളെ തഥൈവ.

കുട്ടിമാമ ഒരിക്കല്‍ ആ കുട്ടികളെയൊക്കെ വിളിച്ചു ഒരു കുട്ടിസദ്യ കൊടുത്തു.

കുട്ടികള്‍ ഇരുന്നു നല്ലപോലെ തട്ടി. തട്ടല്‍ കൂടിയപ്പോള്‍ വിഭവങ്ങള്‍ക്ക് മുട്ടും കൂടി.

കുട്ടികളില്‍ ചെറിയ കുട്ടി പറഞ്ഞു:

''കുട്ടിമാമാ, കുട്ടിമാമാ, നിച്ചു കൊര്‍ച്കൂടി അവീല്‍ മേണം.''

''അയ്യോ, ഇല്ലല്ലോടാ കുട്ടീ, തീര്‍ന്നുപോയി.''

കുട്ടികൃഷ്ണന്‍ പറഞ്ഞു:

''കുട്ടിമാമാ, കുട്ടിമാമാ, ഓലന്‍ വേണം.''

''അയ്യയ്യോ, അത് കഴിഞ്ഞല്ലേ ഉള്ളൂടാ.''

കുട്ടിപ്പാറു പറഞ്ഞു:

''കുട്ടിമാമാ, കുട്ടിമാമാ, സാമ്പാര്‍.''

''എന്താ പറയ്ക, അതൊക്കെ നിങ്ങളൊക്കേന്നല്ലേ മുക്കി മുക്കി കുടിച്ചത്?''

''കുട്ടിമാമയുടെ സന്തോഷം പമ്പ കടക്കാന്‍ തുടങ്ങിയോ എന്ന് സംശയം.

അപ്പോള്‍, കുട്ടൂസ് എന്ന ഒരു കുട്ടിക്കൌപീനധാരി മൊഴിഞ്ഞു:

''കുട്ടിമാമാ, കുട്ടിമാമാ, വെള്ളം.''

''അങ്ങനെ ചോയ്ക്കെന്റെ കുട്ട്യേ. നല്ല കുട്ടി.''

കുട്ടിമാമയുടെ സന്തോഷം പമ്പ കടക്കുന്നതേ ഉണ്ടായിരുന്നുള്ളൂ. അത് അവിടെ നിന്നും ഓടി കുട്ടിമാമയുടെ ചുണ്ടുകളില്‍ തിരിച്ചെത്തി. കാരണം, മറ്റു കുട്ടികള്‍ ഒരാന്നായി വെള്ളം ചോദിച്ചു -

''എനിക്കും'', എനിച്ചും.....''

കുട്ടിമാമ സന്തോഷത്തോടെ ഓരോരുത്തര്‍ക്കായി പാനജലം നല്‍കി (അത് മാത്രമേ ബാക്കിയുള്ളൂ!)