കാഥികന്റെ പണിപ്പുര എന്ന സമ്മാനവും ബന്ധപ്പെട്ട കുറച്ചു കാര്യങ്ങളും

Blog Post No: 131 -

കാഥികന്റെ പണിപ്പുര എന്ന സമ്മാനവും 

ബന്ധപ്പെട്ട കുറച്ചു  കാര്യങ്ങളും

(ഓർമ്മക്കുറിപ്പ്‌)

സമർപ്പണം:

''ഒരു ബസ്സ് യാത്ര'' എന്ന പ്രബന്ധം തയ്യാറാക്കിയതിനു എന്നെ അനുമോദിച്ച അതേ കമലം ടീച്ചര്ക്ക്.  

1968 ഓഗസ്റ്റ് മാസത്തിലെ ഒരു പ്രഭാതം.  പാലക്കാട് ജില്ലയിലെ അയലൂർ ശ്രീ സുബ്രഹ്മണ്യ മെമ്മോറിയൽ ഹൈ സ്കൂൾ വിദ്യാര്ത്ഥികളുടെയും  അദ്ധ്യാപകരുടെയും   അസംബ്ലി. പതിവുപോലെ പിരിയുന്നതിനു മുമ്പായി,  ഹെഡ് മാസ്റ്റർ കൃഷ്ണമൂര്ത്തി അയ്യർ പറയുന്നു - കഴിഞ്ഞ വര്ഷം ഇവിടെ പഠിപ്പിച്ച മലയാളം അദ്ധ്യാപിക കമലം....   (എല്ലാവര്ക്കും ആകാംക്ഷയായി - കമലം ടീച്ചര്ക്ക് എന്ത്പറ്റി?  പാവം, നല്ല അദ്ധ്യാപിക.  അവർ, പറഞ്ഞിരുന്നു, അടുത്തവര്ഷം മുതൽ വേറെ വിദ്യാലയത്തിൽ ആയിരിക്കുമെന്ന്.)  ഹെഡ് മാസ്റ്റർ തുടർന്നു..  കമലം ടീച്ചർ അവരുടെ എട്ടാം ക്ലാസിലുള്ള വിദ്യാര്ത്ഥികളോട് പറഞ്ഞിരുന്നത്രെ -  കൊല്ലപ്പരീക്ഷയിൽ എല്ലാ ഡിവിഷനുകളിലും കൂടി  ഒന്നാമതെത്തുന്ന വിദ്യാര്ത്ഥിക്ക് തന്റെവക ഒരു സമ്മാനം ഉണ്ടായിരിക്കുമെന്ന്.  അതുപ്രകാരം ടീച്ചർ എന്റെ പേരിൽ (ഹെഡ് മാസ്റ്ററുടെ) ഒരു പുസ്തകം അയച്ചു തന്നിട്ടുണ്ട്.  ആര്ക്കായിരിക്കും ഒന്നാം സ്ഥാനം കിട്ടിയത്?  ഞാൻ ആലോചിച്ചു - പതിവായി എനിക്കാണ് കിട്ടിയിരുന്നത്.  എന്നാൽ, ഉണ്ണികൃഷ്ണൻ നമ്പൂതിരി, ജയകൃഷ്ണനുണ്ണി എന്നിവര് എപ്പോഴും തൊട്ട്‌ പിറകിൽ ഉണ്ട്.  എനിക്കോ, അവര്ക്ക് ആർക്കെങ്കിലുമോ?  പ്രധാന അദ്ധ്യാപകൻ പറഞ്ഞു - ശരി, ആരാണ് എം. പ്രേമകുമാരൻ?  ഉണ്ടെങ്കിൽ വരിക.  ഞാൻ സന്തോഷത്തോടെ, കയ്യടികളുടെ അകമ്പടിയോടെ ആ പുസ്തകം അദ്ധ്യാപകനിൽ നിന്ന്  വാങ്ങി.   ഒരിക്കലും മറക്കാൻ പറ്റാത്ത സന്തോഷം നിറഞ്ഞ നിമിഷങ്ങൾ.  ഞാൻ ക്ലാസില്പോയി ആ പുസ്തകം തുറന്നു നോക്കി - എം.ടി.യുടെ കാഥികന്റെ പണിപ്പുര! 

ആ പുസ്തകം വായിച്ചു.  പിന്നീട് ആർ വായിക്കാനായി കൊണ്ടുപോയി എന്ന് ഓര്ക്കുന്നില്ല.  കയ്യിലുണ്ടായിരുന്ന മറ്റു പല പുസ്തകങ്ങളുമെന്നപോലെ അതും പോയിക്കിട്ടി. 

അന്ന്, കാഥികന്റെ പണിപ്പുര വായിച്ച് മനസ്സിലാക്കാൻ മാത്രം ഞാൻ പോരാ എന്നെനിക്കു തോന്നി.  പലരുടേയും പല കഥകളും വായിച്ചു.  എന്നാൽ,  എന്റെ കര്മ്മമണ്ഡലം മറുനാട്ടിൽ ആയതോടുകൂടി വായന കുറഞ്ഞു.  എന്നിരിക്കിലും സാഹിത്യവാസന എന്നെ അതില്നിന്നു പിന്തിരിപ്പിച്ചില്ല.

കഥകൾ മാത്രമല്ല, സാഹിത്യത്തിലെ മറ്റു ശാഖകളിലും എന്നെക്കൊണ്ട് ആവുന്നതുപോലെ ഞാൻ ബ്ലോഗ്സ് എഴുതി.  കഥയുടെ കാര്യം പറയുകയാണെങ്കിൽ - കഥാകാരൻ പറയുന്നപോലെയും, കഥാപാത്രങ്ങൾ പറയുന്നപോലെയും എല്ലാം.  പല കഥാസ്വാദകാരുടെയും, എഴുതുന്നവരുടെയും ഇക്കാര്യത്തിലുള്ള താല്പ്പര്യം വിഭിന്നമാണ്.  ആയതുകൊണ്ട് തിനിക്കിഷ്ടപ്പെടാത്ത രീതിയെ വിമർശിക്കാൻ വരെ അവർ തയ്യാറാവുന്നു.  ഇങ്ങനെ എഴുതിയപ്പോൾ ഓര്ക്കുന്നത് വേറൊന്നാണ്‌: എന്റെ ഒരു അടുത്ത ബന്ധു ഉണ്ട്.  അയാൾ, ഔദ്യോഗികമായി ഒരു കത്ത് തയ്യാറാക്കിയാൽ, തെസാറസ് എന്നതിൽ പോയി കടിച്ചാൽ പൊട്ടാത്ത വല്ല വാക്കുകളും ഉണ്ടെങ്കിൽ അതെടുത്തു കത്തിൽ തിരുകിക്കയറ്റും.  വായിക്കുന്ന ആൾ, സിനിമാനടൻ സലിംകുമാർ പറഞ്ഞപോലെ ''പണ്ടിതനാണെന്ന് തോന്നുന്നു'' എന്ന് പറയണം.  അത്ര തന്നെ.  ഏതായാലും ആ രീതിയോട് എനിക്ക് താല്പ്പര്യമില്ല.

കാഥികന്റെ പണിപ്പുരയെക്കുറിച്ച് എഴുതിവന്നപ്പോൾ, ബന്ധപ്പെട്ടു ഈ കാര്യങ്ങളും എഴുതി എന്ന് മാത്രം.