ഒരു സിനിമാനടിയും കുറെ പൂവാലന്മാരും

Blog Post No: 132 - 

ഒരു സിനിമാനടിയും കുറെ പൂവാലന്മാരും

(ഒരു കൊച്ചു അനുഭവം)

ഞാൻ എന്റെ സ്വന്തം അനുഭവങ്ങൾ പലതും ബ്ലോഗുകളാക്കി.  എന്റെ അച്ഛൻ പറഞ്ഞ, പണ്ട് ബോംബെയിൽ ആയിരുന്നപ്പോൾ ഉണ്ടായ ഒരു കൊച്ചനുഭവമാണിത്.

പതിനാറു വയസ്സ് കഴിഞ്ഞാൽ പുത്രനെയും മിത്രത്തെപ്പോലെ കാണണം എന്ന് അദ്ധ്യാപകനായിരുന്ന അച്ഛൻ പറയുമായിരുന്നു.  ആ നിലക്ക്, ഒരു മകനോട്‌ എന്നതിലുപരി, പലതും എന്നോട് പറഞ്ഞിട്ടുണ്ട്. അതെല്ലാം, ഞാൻ മനസ്സിലാക്കി മുന്നോട്ടുപോകണം എന്നുതന്നെയാകണം വിചാരം.

അച്ഛൻ, മറ്റു അവിവാഹിതസുഹൃത്തുക്കളുമായി ബോംബെയിൽ താമസിക്കുന്ന കാലം.  സുഹൃത്തുക്കൾ ഒരു പുതിയ മലയാളി നടിയുടെ ടെലെഫോണ്‍ നമ്പർ കണ്ടുപിടിച്ചു അവരുടെ ''രോഗ''ത്തിനു ആശ്വാസം കണ്ടെത്താൻ തീരുമാനിച്ചു.  നടി ഒന്നുരണ്ടു സിനിമകളിൽ അപ്രധാനമല്ലാത്ത വേഷം  ഇട്ടിട്ടുണ്ട്.  ഹിന്ദി നടൻ അശോക് കുമാർ മുതലായവർ തിളങ്ങാൻ തുടങ്ങിയ കാലം.

പാവം നടി.  അവൾക്കു പൊറുതി മുട്ടി.  ഒരു സന്ദർഭത്തിൽ, വളരെ ശാന്തയായി, സുഹൃത്തുക്കളിൽ ഒരാളുടെ വിളിക്ക് മറുപടിയായി ഇങ്ങനെ പറഞ്ഞത്രേ:

സഹോദരാ, നിങ്ങൾ ഇവിടെ വന്നത് വയറ്റുപിഴപ്പിനല്ലേ?  ഞാനും അങ്ങനെതന്നെ.  എനിക്ക് സഹോദരന്മാർ ഇല്ല.  അതുകൊണ്ടുതന്നെയാണ് ഇങ്ങനെ വേണ്ടിവന്നതും.  എന്റെ അവസ്ഥ ഒന്ന് ആലോചിച്ചു നോക്കൂ.  അപ്പോൾ നിങ്ങൾ എന്താണ് ചെയ്യുന്നത് എന്ന് അറിയാം.  പ്ലീസ്...

അത് കേട്ട ആൾ ഒന്ന് വിളറി.  മറ്റുള്ളവർ ചോദിച്ചപ്പോൾ വിവരം പറഞ്ഞു.  അതിനുശേഷം അവർ ''നല്ല കുട്ടികൾ'' ആയി.