കുഞ്ഞുകവിതകൾ - 81

Blog No: 326 –

കുഞ്ഞുകവിതകൾ - 81

ചിന്താവിഷയം - സുഖദു:ഖങ്ങൾ

ഒരു കുന്നിനൊരു കുഴി,

ഒരു ദുഖത്തിനൊരു സന്തോഷ-

മിങ്ങനെ നിമ്നോന്നതങ്ങ-

ളെന്നുമുണ്ടാകുന്നു ജീവിതത്തിൽ;

സുഖത്തിൽ സന്തോഷിക്കുന്ന നാം,

ദുഃഖം വരാമെന്നുമോർക്കണം,

അതേറ്റുവാങ്ങാനായ് മനസ്സു

കെട്ടിപ്പടുക്കണം, തയ്യാറാകണ-

മങ്ങനെ ദുഃഖത്തിന്നാഴം കുറയ്ക്കാം!

വ്യത്യാസം

ചക്രവാളത്തിന്റെ നിറം മാറുന്നു,

പ്രകൃത്യാൽ, കാലാവസ്ഥക്കനുസരിച്ച്;

മനുഷ്യന്റെ നിറം മാറുന്നു,

പ്രകൃതത്തിന്, സന്ദർഭത്തിനനുസരിച്ച്!

പ്രകൃതി മനുഷ്യനെ സംരക്ഷിക്കുന്നു,

മനുഷ്യൻ പ്രകൃതിയെ ചതിക്കുന്നു!

തൊട്ടാവാടി

തൊട്ടാൽ വാടും

തൊട്ടില്ലെങ്കിൽ വാടില്ല

തൊടാതിരിക്കുന്നതെങ്ങനെ

തൊട്ടാവാടീ, നിന്റെയൊരു കാര്യം...